老師虐待囡仔 教育局煞批准退休.引家長不滿
發布時間：
更新時間：
進前臺中有一位姓胡的老師，因為會虐待囡仔，去予家長投訴，落尾轉去別間幼兒園，也出現仝款的情形。想袂到這個老師，利用案件調查期間，講家己破病欲申請退休。臺中教育局表示：已經退回申請，愛等學校教評會的調查結果出來，才來看是毋是欲解除聘請。
臺中市黎明國小附幼，受害者家長表示：「阮是佇舊年受著胡老師的傷害，接受學校的調查，到今一年伊也無共阮講調查的結果。」
台中黎明國小家長提囡仔舊年佇學校去予老師不當管教的相片，指控台中市政府過一年無主動協助調查，尾手這位姓胡的老師經過學校的行政處分記以申誡結案，就去僑仁國小幼稚園教，結果仝款傳出苦毒囡仔的代誌，家長表示20外年來，這位老師已經換過6間學校，煞繼續教，批評根本是體制掩護。
臺中市僑仁國小附幼，受害者家長表示：「家長無法度接受案件調查中潦草批准退休，予伊全身而退，請針對胡老師在職任教期間，造成濟濟囡仔心驚膽嚇，情緒無穩定、抵抗上課，予伊上嚴厲、公正的調查佮懲罰。」
家長不滿老師佇調查期間，竟然講破病申請退休，佇這個月15生效，不過台中市教育局表示已經退回申請，認定老師牽涉教師法，有虐待兒童的疑慮，可能愛解聘。
臺中市教育局副局長，葉俊傑表示：「準若牽涉教師法14條15條，教評會就愛判伊停聘偌久，既然有停聘，暫時就袂當退休矣。若單純屬於教學不力，或者是教學不當，若像黎明國小按呢，落尾是行政處份，就算結案，伊就會當提出退休。」
台中教育局表示這陣就等僑仁國小教評會調查結果出來，若有苦毒，就愛停聘。受害家長佇記者會後，佇人本基金會陪同下去監察院陳情，請委員介入調查。
