各國人士爭取人權煞受迫害 民眾寫批畫圖聲援

爸爸陪囡仔，鬥陣寫字，希望聲援佇白俄羅斯受迫害的青少年，也有插畫家用畫筆，呼籲烏克蘭重視女性和LGBTI安全生活的權利。

插畫家 Morgan表示：「若是𪜶會當收著遮的批，猶是收著咱畫的圖，按呢可能會當予𪜶知影講，佇真遠的所在，也有人知影𪜶的故事。」

聲援民眾表示：「這改注意的足濟案件攏是青少年，或者是兒童，就會感覺這種代誌，愛自細漢就予伊知影。」

國際特赦組織台灣分會20佇台北辦寫批馬拉松活動，今年欲聲援包括瓜地馬拉、中國、埃及等等10人，in因為捍衛新聞自由、和平集會、性別和種族平等，人就按呢消失，或者是予人誣賴、掠去關。

國際特赦組織台灣分會秘書長，邱伊翎表示：「全球的國際特赦組織，佇舊年咱有450萬人寫批和連署行動，舊年10个個案內底，就有6位會當轉去厝，無閣繼續關佇監獄內底。」

義大利經濟貿易文化推廣辦事處代表，紀大為表示：「台灣佇地域性扮演誠重要的角色，像佇LGBTI相關議題，同性婚姻合法化，我也相信台灣的影響力，是閣較有國際性的。」

國際疫情雖罔猶袂結束，不過國際社會聲援人權的力量，透過網路連署、寄批，增加對當局的壓力，予釋放維權人士、重新調查不義審判等等倡議平等的案件有機會見光。