開3冬提證明煞搪疫情 露營業者望損失緊補轉

新竹有露營業者,等待3年的時間,總算提著楦闊營區的合格證明,想袂到煞搪著疫情。這馬防疫警戒降做二級矣,真濟民眾準備欲出來遊覽,業者希望趕緊恢復營業,共損失攏補轉來。

聽著敲電話來訂房的人愈來愈濟,業者總算較放心矣,受疫情衝擊新竹露營區已經停業2個外月,這段時間完全無收入,真濟人攏講得欲擋袂落去矣,毋過嘛有業者是趁時間增加設備。

露營區業者蕭宜峯表示,「已經兩個外月,阮這攏完全零收入,毋過阮的員工攏全薪,嘛無半薪。經過雪霸國家公園的審核,阮申請三冬外總算申請落來矣。」

一台一台經過改裝的巴士,內底準備囥眠床等等的設備,這就是後擺新的露營區房間,因為高海拔的關係,這種熱天嘛免開冷氣。
露營區業者蕭宜峯講,「會使直接看到森林,因為是海拔兩千外公尺的露營區,這上重要的是攏無蠓仔,阮攏講是無熱天的露營區,暗時攏15至16度。」

疫情降級,觀光業者攏準備好勢,欲迎接紲落來的歇熱,希望會使共停業期間的損失,好好仔補轉來。

全台敬老金大調查

相關新聞