國家音樂廳今准觀眾入場 國家圖書館也開放

國家音樂廳本底佇拜六,欲舉行線頂音樂會,也因為疫情警戒降到第二級,就決定開放民眾入場聽音樂會。另外,國家圖書館今仔日嘛重新開放,這馬佇門口有顯示館內的人數,限制288人。

民眾入場來買票,因為疫情警戒27開始降到第二級,國家音樂廳原本拜六的線頂音樂會、決定開放賣票予民眾入場看,這擺開放5成左右的位,500外張的票,開賣第二工下晡,就干焦賰六十幾張。

國家兩廳院藝術總監 劉怡汝:「這擺會加強的嘛是人流的動線,通常演出結束,逐家會集中佇非常短的時間離開,第幾排的以前的人請往這个門行,第幾排的以後的人請往彼个門行,用按呢的方式予逐家加一寡限制,行路的動線佮方向這擺會加一寡要求。」

工作人員替民眾服務借冊,國家圖書館嘛重新開館,民眾會使來看冊、自習,館內人數是限制佇288人。

國家圖書館知識服務組主任 李宜容:「設計這个人流管制的電腦,只要入來就會使看著館內的人數有偌濟,譬如講六个人的位,干焦予兩个人坐,兩个人坐中央有一个塑膠布,四个人的位就一个人坐。」

李宜容表示,討論室等等較無法度維持社交距離的空間,猶是無開放,遮的空間會繼續遵循中央的防疫規定,未來才來研議開放。

全台敬老金大調查

相關新聞