外籍移工目前留佇臺灣食頭路攏有期限，因為按呢，出現年限到期，移工偷走去的現象。雇主也會煩惱移工若離職，閣愛重新揣人。有學者認為，移工年限延長，無的確會較好管理。針對這个部份，勞動部最近也咧研究草案，考慮予來臺做工課、滿六冬的移工，會當轉做技術移民的機會。
替96歲的阿媽掠龍反身，照顧阿媽14冬的印尼看護LINA做甲真熟手，毋過這馬伊煞面臨年限到期，著愛強制轉去印尼的問題。
看護工：「我想欲繼續佇遮，因為已經慣勢矣。」
雇主：「伊來台灣已經14冬，會當繼續落去是上好的，阮雇主毋免閣重新訓練。」
看護工：「已經像厝內人，阿媽也那親像我家己的阿媽，就是按呢。」
雇主：「尤其像阮媽媽長期倒床，根本袂振動得，阮也真正需要in來鬥相共。」
像LINA這个案例，會使講已經對聘僱關係提升到感情的層面，但是照現階段移工適用的就業服務法52條規定，家庭看護工，佇台灣食頭路的時間袂當超過14冬，從事別的類別像產業工袂當超過12冬。這馬因為疫情關係，欲減少人員流動，勞動部開放會當閣延半冬，毋過移工的年限，對過去就延幾若擺。
社會上就有主張愛予移工會當申請永久居留權，勞動部最近也當咧研議新經濟移民法的草案予行政院佮國發會，希望用中階技術人力的方式予移工會當有機會轉做移民。
文化大學勞動力暨人力資源學系副教授辛炳隆：「佇台灣的外籍移工，咱攏用客工制度，所謂的客工，袂當申請台灣的永久居留權，所以伊也袂當揣厝內人來台灣，你予伊留落來，10冬、14冬甚至是留到20冬，真濟人認為這是誠無人道的。」
勞動部勞動力發展署跨國勞動力管理組副組長蘇裕國：「這寡已經曾經佇台灣食頭路六冬的移工，因為伊已經有一定的技術水準，比較較熟手，也參雇主的關係比較較好，未來就希望透過，中階技術人力的制度，會當予IN對移工轉變做移民制度。」
文化大學勞動力暨人力資源學系副教授辛炳隆：「遮的人基本上是有勞動能力的，我相信伊的牽手來，也是有勞動能力的，所以毋但免煩惱講，會有社會福利增加的負擔的問題。甚至會當解決，咱這馬驚勞動力不足的問題。」
ＴＩＷＡ研究員吳靜如：「為啥物白領勞工的工課，會當無期限限制，只要有頭路伊就會使繼續做。為啥物藍領就愛有按呢的限制，為啥物有這種階級差別的對待。」
台灣對1989年開放東南亞移工已經32冬，移工猶原有真濟法律上的限制，親像LINA這種的長照人力敢有法度留落來繼續照顧阿媽？是欲透過開放申請移民，抑是廢除居留年限？看起來著閣需要一段時間來討論。