交大.清大逐年合辦"梅竹賽" 今年煞煏濟濟爭議

交通大學參清華大學,往過逐年攏會舉辦梅竹賽,舊年受疫情影響停辦,今年又閣恢復矣,交通大學這陣也已經整合做陽明交通大學。毋過這改的比賽有真濟爭議,目前10項比賽項目,干焦賰2項,而且清大的老師,嘛無人出席今仔日的開幕典禮。
 
選手盡全力佇比賽中拚輸贏,這是過去梅竹賽精彩的比賽畫面,猶毋過今年因為兩爿對比賽內容有真濟爭議,無法度有共識,原本有10項正式的比賽項目,可能干焦賰2項。

毋但比賽項目受著影響,就連今仔日舉行的開幕典禮,清大這爿嘛無任何師長代表學校來到現場。清大佇事後發聲明表示,這改比賽棒球項目的時間佮全國大專院校棒球比賽的時間相重疊,無法度參加,另外鵝毛球項目,對方有兩位選手捌代表其他學校出賽,清大嘛有疑慮。

這恐驚會是梅竹賽歷史上頭一遍,有一爿的學校師長無參加開幕典禮,嘛予陽明大學參交通大學合做伙了後,頭一擺參加的梅竹賽,特別受著外界的注目。

相關新聞

專題|全台敬老金大調查