南投水里農會的家政班，趁聖誕節欲到進前，邀請老師來教逐家，利用各種樹子來做聖誕花環，咱做伙來看覓。

各種百樣的樹子排規盒，這攏是家政班成員的姆仔、阿姨，對徛家附近、田園四邊抾來的。配合水里農會開辦聖誕花環課程，請老師來教逐家製作環保閣媠、當著時的節日裝娗。

連鞭就是西方宗教的大年節──聖誕節。農會特別舉辦聖誕花環製作課程，真合12月的慶祝氣氛，閣用樹子做裝娗，毋但環保，嘛響應綠色照顧政策，由農會提供空間、課程，提升社區內的老大人生活品質。

遮的姆仔、阿姨認真咧黏樹子，一个一个圓躘躘閣環保的聖誕花環，陸續完成，愈倚年底的慶祝氣氛嘛愈厚，家己做聖誕藝術品，嘛增添過節的氣氛。