烏柑仔蜜真罕見 屏東農民研究4冬產量才穩定

欲招觀眾朋友，來看一種烏的柑仔蜜，屏東里港一个農民，因為進前佇咧國外，食著這款真特殊的tomato種，4年前就開始種，也無人通教，只有是那摸那學，伊講這種烏的柑仔蜜、營養成分嘛和別款煞無仝，咱著做伙來了解一下。

園裡一粒一粒生做袂輸李子的模樣，竟然是一種烏色的柑仔蜜，真罕得看見，切開內底的肉是紅色的，配水果看起來真好食。這款特殊的烏色柑仔蜜，是屏東里港的農民陳昱辰意外發現，伊投入四冬，這馬才有穩定的產量。


臺灣種烏柑仔蜜的人並無濟，陳昱辰自己那做那學。伊發現這款柑仔蜜需要炤日，才會由青反做黑紅、黑紅的色水。伊共種出來的烏柑仔蜜提去檢驗，內底有茄紅素、閣有花青素，食了營養健康。

原底是做水電的陳昱辰，為著照顧序大轉來故鄉種作，目前通路有客訂配送閣有遊客現挽兩種。伊毋但骨力種作，嘛研發濟濟保養品，就是欲予這款誠有營養價值的烏柑仔蜜發揮上大的用途。