傳訊息用華語倚音表達台語 民眾看甲霧嗄嗄

有網友佇網路貼文，講老爸傳訊息，問伊有紮鎖匙無，兩工內已經有9萬外人揤讚，嘛有真濟網友分享這款華語透濫台語的情形。親像「歐規條有沒有超生了」，就是台語芋粿條敢有臭酸的意思，桌頂有囥烏甜仔、也予序細聽甲霧嗄嗄。四神湯、冬粉的寫法，嘛予真濟人看著愛笑。有台文系的學生分享，厝裡的序大，嘛會定定傳台語火星文予伊，伊攏會去共in教正確的台文字。

臺師大台文系學生 陳意茹
一開始我會共𪜶(長輩)糾正這毋是按呢寫 伊正確的字是按怎後來𪜶佇咧佮朋友講話的時陣有當時仔濫著台語就會先傳訊息來問我講這字的台語是欲按怎寫

有台文系教授指出，臺灣多數人毋知影台語有字，這和教育有關係。因為臺灣是對2001年開始才有台語課，毋過因為彼陣干焦國小才有，所以教學的深度、和延續性攏無夠。

臺師大台文系教授 蔡惠名
過去佇咧2001年90課綱其實伊就干焦鎖佇咧國小，伊可能就是唱歌 較濟就是唱歌，國小敢真正會去教台羅拼音，真正教足深的台語漢字，其實較濟嘛是教華台共同詞

學者表示知影台語有字的學生，是2018年國家言語發展法、三讀通過了後，規个國家動起來，才開始有進步的現象。

臺師大台語系教授 蔡惠名
這擺的國家語言發展法通過了後，有一个無仝款的所在，就是頭拄仔有講的伊有延伸，因為咱咧學習的過程內底，總是愛有記持，記持總是長期閣較好是毋是，所以伊會當延伸到國中延伸到高中，閣有另外一个就是我頭拄仔講的，規个社會其實是咧振動的

學者認為民眾需要先建立台語正字的觀念，才來發展趣味的倚音，若是欠缺台語正字的觀念，這款火星文顛倒會予人看甲霧嗄嗄、真歹理解。

記者鄭亞宣 林郁凱臺北報導