全臺第一間台語實驗小學 北嶺國小開觀摩會

高雄市北嶺國小老師 曾詩賢:「你拄才有偷啉無，無，你有偃倒無，無」

老師用台語教數學、問問題，臺跤的二年仔囡仔嘛用台語應，高雄路竹的北嶺國小，自今年2月開始試捒用台語教冊，九月份正式誠做台語實驗小學，目前除了國語、英語這兩項語言課，無用台語上課，其他親像數學、社會、生活健康甚至是體育課，攏會當聽著老師囡仔咧講台語。師生經過這半年的浸水式教學，台語攏越講越好。

高雄市北嶺國小六年級 薛同學:「台語課上好耍（為啥物)，因為有當時考試煞會當看影片」

高雄市北嶺國小二年級 王同學:「（你平常時上佮意做啥物)畫圖佮運動，（做啥物款的運動)棒球」

高雄市北嶺國小老師 曾詩賢:「聽家長講這馬寫數學的時陣，喙會沓沓仔 會踅踅唸，一个兩个三个四个，就是會唸出喙 唸出聲，家長就會感覺誠趣味呢，阮囝會當開始講臺語矣」

北嶺國小成做全國頭一間台語實驗小學，無論是學界抑是家長攏有質疑佮建議。校長講，這擺的觀摩會毋是成果展現，是向望予外界瞭解學校實際的做法，校長強調,老師用台語上課，若搪著囡仔台語聽毋捌的,嘛會用華語閣解釋，袂因為用台語上課都去影響囡仔的學習。

高雄市北嶺國小校長 蘇恆欽:「用台語來教數學，用台語來教社會，按呢是毋是影響著囡仔的成績，其實這點就是講嘛欲請家長來放心，毋管是用佗一種語言來教學科，阮重視的就是學科的智識」

這陣學校有3位台語專業師資來加入協同教學，幫助學科老師來備課、教冊。有老師講，欲學語言，環境誠重要，有囡仔對原本攏袂曉，這陣也會使講幾句，像伊經過這半冬的教課，就予伊家己嘛共台語閣抾倒轉來。