京華城案檢察官台語問話 辯護律師講違法

臺北地方法院猶閣咧審理京華城案，煞有律師指出頂禮拜，臺北地方法院審「京華城案」的勘驗程序，檢察官全程使用台語問話，煞予沈慶京的辯護律師，以違反法院組織法第97條「應用國語」提出異議。律師認為沈慶京律師的訴求，已經違反國家語言發展法的精神。

非案件當事律師 黃帝穎：「（沈慶京）伊的辯護律師，欠缺法治上的常識，連檢察官使用台語，佇偵訊光碟內底出現台語，攏愛閣予人議論，講你違反法院組織法，完全無看著國家語言發展法，已經明文規定，你袂使歧視任何語言。」

台語政策推動聯盟拜三召開記者會，指出照目前的法院組織法，規定審判時應該使用的語言。雖然以前、佇1938年是規定應該用中國語言，1989年修訂做應該用國語，聯盟指出，這馬應該愛改做應該用國家語言才著，按呢才合國家語言發展法對國家語言的定義，確保台語、客語、原住民語，和馬祖語等等的族群，受著公平對待。

台語路協會公關部部長 薛翰駿：「雖然這馬有人建議，你照講應該會當解說做國語；毋過就像律師所提出來講的，怹認為的國語就是華語。所以咱這改的訴求，其實嘛誠簡單，就是咱應該共國語，共正式改做國家語言。」

台語政策推動聯盟召集人 許慧盈：「佇彰化、雲林、嘉義，攏有超過講60%以上的人，怹是以台語來思考，伊愛去法院愛講話的時陣，你強迫伊講華語，伊是無法度完整來表達伊的感情。」

台語政策推動聯盟指出，目前臺灣猶有86%的台語人口，特別是中南部地區閣較普遍。聯盟主張佇司法現場，法院應該先調查當事人希望使用的語言，然後提供翻譯服務，予民眾會當用家己熟的語言、維護家己的權益。

記者 鄭亞宣 林郁凱 臺北報導