「頭家是東北人、請莫講台語」 擔仔告示引風波
發布時間：
更新時間：
最近一位對中國東北來的移民，佇嘉義賣糋的，擔仔的告示牌寫講，請人客莫講台語，引起濟濟討論，支持的和反對的人攏不止仔濟。有台語團體認為，臺灣有8成的台語使用人口，像按呢分裂臺灣社會，恐驚會予中國軁空縫、統戰臺灣；嘛有學者表示，臺灣雖然是尊重多元的國家，毋過咱嘛愛會記得，保護家己的本土文化和語言。（新聞標題、導言及內文皆為台語文）
最近佇咧嘉義有一間賣糋路的店家，因為佇告示牌寫講「頭家是東北人，請莫講台語，多謝」咧網路頂引起爭議，濟濟民眾嘛有無仝看法。
民眾 伍先生：「逐家會認定逐家會講華語，就是Mandarin，但是就是你袂當去認定講，逐家攏會曉講台語。」
民眾 徐先生：「佇咧別人的所在做生理，你要求別人莫去講伊的話，要求怹來就是講綴你的規矩行，人會袂爽是因為這个點按呢。」
目前這个店家是暫時關店歇睏，毋過頭家佇網路有刊文章回應，講家己無歹意，煞因為語句表達無夠妥當引起誤解，伊講家己當咧拍拚學台語。店家的厝邊出面表示，因為這附近的濟濟消費者攏較慣勢講台語，嘛是鼓勵頭家學聽、學講。
店家的厝邊：「咱佇臺灣做生理你就是台語、華語攏愛會通，按呢逐家較有法度做生理；我也是鼓勵伊學習，伊嘛願意學。」
針對「莫講台語」這件代誌，有不止仔濟情緒性的討論，台語政策推動聯盟認為，臺灣有8成的台語使用人口，像按呢分裂臺灣社會、造成對台語的反感，恐驚予中國通軁縫統戰臺灣。嘛有學者表示，語言和文化，攏是建立主體認同真重要的一部份，認為咱身為臺灣的主人應當愛愈注重。
臺師大臺文系主任 莊佳穎：「我感覺臺灣社會是一个真尊重多元的社會，但是伊嘛是一个足少年的民主國家。所以民主的意義、多元的意義，到底是啥物？就是講你是尊重多元到家己攏無去
，抑是講尊重多元，但是你家己本身的主體性，你是有去保護的。」
臺灣話講入鄉隨俗，學者認為袂曉講臺灣的本土語言毋是罪過，濟濟外國人攏是到臺灣才開始學的。學者提醒講臺灣雖然是尊重多元的國家，毋過咱嘛愛會記得保護家己的本土文化和語言。
記者 呂尚儒 莊浚佑 林緯廷 臺北-嘉義報導
唐嘉良/編輯
