太陽星君聖誕款「九豬十六羊」 展府城歷史特色

共麵粉撋撋咧，貯入府城特有祭品豬佮羊的印模，做成餅皮抑是鳳片糕來賣。舊曆三月十九這工，是太陽星君的聖誕，濟濟人會提早注文糕仔餅做祭品。這陣民眾食食慣勢改變，所以多數餅舖平常時攏較無專門咧做這，干焦佇這禮拜才會做，致使「九豬十六羊」這項文化漸漸失去。臺南市文化協會為著推動保存，辦導覽巡禮，tshuā民眾去廟寺行踏，聽導覽、看文化。

有民眾表示：「這是臺灣保護的文化，所以特別想欲來看一下。」、「想講足好奇，我蹛高雄 ，臺南足傳統的信仰文化，進前攏完全毋知影。」

天心軒餅舖老闆娘吳太太表示：「差不多四工前就愛開始準備、開始做，這閣是手工，這是綠豆糕做的，閣有鹽糕仔、參鳳片糕仔。」

臺南市定民俗資產「九豬十六羊」，對清朝傳到今，糕餅的印模有特殊的意涵。對這圖來看，倒爿是豬仔，正爿是羊，排做伙是一字「明」。文史工作者講，「九」的音倚「救」，「豬」參明朝皇帝的姓仝音，若「十六羊」拄好是明朝十六任的皇帝。就因為清時袂使公開祭拜明朝的人物，後來就相傳用太陽星君聖誕，來懷念明朝過往的皇帝。

文史工作者鄭道聰講：「九豬十六羊就是九隻豬，就是『救世朱』的姓朱的十六代君王，對明太祖到明思宗攏總16代的皇帝，所以以這个概念來講這祭祀的重要性。」

文史工作者講，其實早期有人會嘛做米芳來拜太陽星君，抑是用青米、米糕等米製品，來祈求五穀豐收，in講這文化若無好好傳承落去，未來少年人可能會失去參這份歷史的連結，in講未來會繼續用行讀活動予逐家閣較了解這片土地。