民團連署促跨部門合作 成立台語復振委員會
發布時間：
更新時間：
臺灣客語有客委會，原住民語有原民會，逐年攏有預算咧推行語言復振的事工、佮母語家庭的計畫，台語政策推動聯盟最近發起連署，希望招民間各界的力量，來推動政府成立「台語復振委員會」，嘛指出長期以來，台語復振攏交予文化部、教育部咧做，所以推捒的政策無法度全面化，呼籲迒部門合作，推動台語服務，和意識培力。（新聞標題、導言及內文皆為臺語文）
台語政策推動聯盟咧舊年，有舉辦第一屆的「全國台語政策民間會議」，招民間做伙來檢討語言政策，最近聯盟發起連署，要求政府愛成立「台語復振委員會」，怹指出親像客委會逐年預算有41億、原委會逐年64.7億，根據內政部109的調查，6─14歲的人口當中，干焦賰7.4%主要使用語言是台語，聯盟認為若無專責單位來扞，閣10外年後，台語恐驚會消失。
臺灣台語路協會理事長 董力玄：「這其實足需要整體去規畫。你到底欲按怎對阮這寡卵仁區共伊捒出去，捒甲予閣較濟人知影講有這个（台語）計畫，這無人去做你就踏袂出去，就干焦佇咧仝溫層內底家己爽爾。」
聯盟指出台語的事工，長期以來攏交予文化部、教育部咧做，嘛予台語復振受著限縮，無法度全面化，聯盟建議政府愛迒部門推動語言意識的培訓、制定台語的政策規畫。抑若學者認為，台語有8成的使用人口，和華語平平攏是社會共通語，所以定位袂當限縮佇族群語言爾爾，學者嘛認為比起華語，台語愈通抵抗中國咧臺灣各方面的滲透。
臺師大臺文系主任 莊佳穎：「臺灣華語生的模樣，已經愈來愈像中國華語，無論講是語詞抑是思考的體系。這LINE內底傳的到底是中國的物件，抑是一个假消息？所以講這是國家安全，閣有建立主體性上重要的一步。」
根據語發法，學者呼籲政府愛對外交、衛生福利等等，咧無仝政府部門，推動台語服務，和意識培力，會當透過台語檢定考試、工作坊等等的方式，咧公部門體系建立機制和配套，學者認為按呢台語的轉型正義佮復振，才袂變做干焦是喝口號爾爾。
記者 呂尚儒 莊浚佑 臺北報導
唐嘉良/編輯
