世界母語日 臺南國中小舉辦活動鼓勵講台語

學生囡仔唱歌跳舞，嘛有人改編「大道公風，媽祖婆雨」的民間故事，這是臺南市七股建功國小學生，怹透過表演、創作展現學習台語的成果。這間學校全校雖然無40个人，猶原拚勢咧推廣母語，鼓勵學生創作台語詩，閣共作品做成冊楔仔予囡仔留做紀念，學生嘛一句一句唸出家己的創作，充滿成就感。

臺南市七股區建功國小學生：「我對月娘有興趣，所以就共變做一首詩。」

臺南市七股區建功國小老師 陳香蘭：「寫詩的過程怹會去思考，而且阮嘛結合學校本土的的文化。囡仔嘛寫甲足歡喜，怹定定嘛會利用下課來揣我寫詩。希望咱的台語會使永遠，好好仔傳承落去。」

建功國小長期tshuā學生參加《海翁台語文學》、《幼穎兒童台語文學》等比賽，校方講，這嘛是予學生留下寶貴的記持。另一爿，安平國中用遊戲推廣母語，學生就愛學五句台語好話抑是俗諺，閣講予老師、家長聽，就有機會跋桮換獎品。校方表示，用趣味的方式，毋但會當增加學生的學習動機，嘛通提升怹的語言能力。

臺南市安平國中學生：「平常時上課攏會用遊戲抑是用平板，來練習阮的台語，所以我感覺台語就無遮無聊。」

臺南市安平國中校長 郭憲璋：「語言這个物件本來就愛參生活做結合，所以阮毋但上課、母語日才有咧講爾，隨時隨地轉去厝佇學校，攏會使練習母語。阮予囡仔有發揮空間、練習的機會。」

安平國中校長講，希望予學生感受母語毋干焦是學科，嘛是生活的一部份。學校嘛真鼓勵學生考台語認證，就連校長、老師攏tshuā頭投入，向望打造一个自然的台語學習環境。

記者 李晨宇 臺南採訪報導