人權館展覽看見政權迫害 望臺灣母語莫失傳

「臺灣母語是行坎坷的路。」

佇台頂表演台語唸歌的是，是台文作家、也是台語文運動推行者--周定邦，用唸歌唱出母語予人打壓的過程。伊講，佇日本時代日本政府強迫咱講日語，到威權時代國民政府閣強迫咱講華語。如今，咱台灣的母語台語，面對失傳的危機，需要逐家鬥陣來復振。

台語文運動推行者周定邦講：「你無錢像阮彼陣遮散赤，阮無錢通予罰就是予老師拍、掛牌仔，按呢就是你會感覺講是按怎？你大漢起來你會想講，我是按怎講這个話愛予人罰錢。」

斟酌聽，這齣歌仔戲毋是台語配音是華語，就連小學生寫功課的桌仔頂面嘛印大大的中國地圖。白色恐佈受難者洪武雄，是一个退休的警察，伊講彼當時國民政府來台灣，逐家佇警察局開會攏干焦會當講華語，私底下才會當講台語。

前大安分局警察洪武雄表示：「若咧講話袂當講台語啦，佇咧辦公室攏講華語攏講北京話，台語是咱私下咧講的時陣，招同事欲出去𨑨迌，來佗位𨑨迌才講(台語)按呢。」

為著鼓勵民眾共台語揣倒轉來，國家人權博物館，舉辦「戰後語言政策佮人權議題」的展覽，內面紀錄對日本時代、到國民政府時期，兩改的國語運動的文物。戰後的語言政策，控制著咱台灣人的喙舌，國家人權博物館希望透過展覽，予民眾進一步思考語言傳承危機，去意識著語言無平權，母語欲繼續傳承也需要有轉型正義。