民間欲辦台語政策會議 招中央參加、交流意見

就算文化部有舉辦幾落場的「國家語言發展會議」，來討論臺語政策推捒的現狀，毋過有濟民間的臺語推廣團體認為，這个會議推捒臺語政策的力頭無夠。in決定佇12/22欲辦一个「全國台語政策民間會議」，毋但會邀請中央部會來參加，嘛會開放民眾報名，希望這个會議通成做民間佮政府之間交換想法的平台。

今年7月到10月由文化部、原民會、客委會等等單位舉辦的國家語言發展會議，討論國家語言發展法施行了後，國家語言的發展狀況。因為臺語無中央層級的主管機關，濟濟臺語團體認為，會議對臺語議題討論的深度無夠，決定欲佇12/22由民間團體合作舉辦頭一屆的「全國台語政策民間會議」。

臺語政策推動聯盟召集人許慧盈表示：「臺語就是寄佇咧文化部的一个科內面、幾个仔人按呢，譬如講人嘛無夠、資源攏無夠。這過去咱就是一直講想欲來反省這件代誌、想欲檢討，政府可能想欲做，嘛毋知影按怎起頭。」

民團表示，臺語目前欠缺中央主管機關，無像原住民語有原民會、客語有客委會。這改「全國臺語政策民間會議」的主辦團體之一——「台灣台語路協會」指出，in長期爭取全臺語教學的臺語學校，通維持臺語家庭囡仔的語言環境，但是因為無迒部會的資源來整體支持，是真僫捒。台灣台語路的協會理事長董力玄表示：「親像文化部已經開始有注意著這塊，有臺語家庭的相關政策捒出來，但是教育部這爿囥佇臺語的資源猶是足少的，咱若是無用臺語來做教學語言的學校，按呢這个語言是無可能救會活的。」

除了臺語囡仔的教育問題，會議也會針對臺語轉型正義、臺語教育檢討這寡面向，來檢討現行的臺語政策。民間團體會邀請文化部、教育部等等中央部會參與，也開放民眾報名參加，按算拜五（12/6）開放報名，in希望這个活動通成做民間佮政府之間交流臺語政策想法的平台。