楊双子《臺灣漫遊錄》 得著美國國家圖書獎
發布時間：
更新時間：
臺灣長篇小說《臺灣漫遊錄》的英文版（Taiwan Travelogue），佇美國時間11/20，提著「美國國家圖書獎」的翻譯文學大獎，這是臺灣文學頭一擺佇美國國家圖書獎入圍著獎。出版社也表示，這是世界級的大獎，真受著文學界的關注。英文版佇11月中上市了後，也引起其他國家注意，目前有英語、日語、韓語的版本，抑若捷克語的出版，也當咧討論。（新聞標題、導言及內文皆為臺語文）
「2024美國國家圖書獎翻譯文學獎，著獎的人是：楊双子。」
《臺灣漫遊錄》作者楊双子佮英文翻譯者金翎佇美國紐約的頒獎典禮，知影作品著「美國國家圖書獎」，歡喜甲激動相攬，這是臺灣文學史上頭一改佇美國國家圖書獎入圍著獎。
《臺灣漫遊錄》作者 楊双子：「應該講10本冊到5本冊，到最後這本冊，這三个過程對我來講攏是，若眠夢仝款，抑是講傷無現實的感覺。」
作者楊双子分享，伊感覺這一切猶袂反應過來，伊也表示，小說寫100年前台灣的過去，是為著欲行向未來，希望透過作品，予民眾產生共鳴，毋管過去、這馬、抑是未來，台灣是台灣人的台灣。
《臺灣漫遊錄》作者 楊双子：「日常的物件你會感受著出現差異。壓迫閣較強的時陣，臺灣人會開始思考，我到底是啥物人；抑是我佇這个時代欲做出選擇的時陣，欲按怎選擇。」
《臺灣漫遊錄》佇2020年出版，小說內底除了展現台灣的小點仔，也講著女性情感佮殖民議題，這馬有日語、韓語、英語的版本，英譯版本11月中佇美國上市了後，也引起其他國家的討論，出版社表示， 美國國家圖書獎是美國文學界真懸的榮譽，著獎對台灣的文學是真大的肯定。
春山出版社總編輯 莊瑞琳：「基本上美國國家圖書獎會使講佮普立茲獎，是兩个上重要的圖書獎項。對阮來講，臺灣的出版社，攏誠關注這兩个獎項著獎的作品。」
出版社也希望，未來愈來愈濟外國讀者會當透過文學認捌台灣。作者楊双子強調，這幾冬台灣漸漸予世界看著，毋管是對政治方面抑是社會上的各種角度來看，也是因為台灣的知名度提升，台灣的文學才會行向國際，受著愈來愈濟人的關注。
記者 張佳倪 謝季潾 臺北報導
唐嘉良/編輯
