中央社揣專家討論台文出版 編輯技術是挑戰

這幾年台語文出版品愈來愈濟，銷量也愈來愈好，中央通訊社出版的電子冊，也透過訪問台文出版界的專業人士，討論台文出版的市草佮發展。但是有出版社就講，佮華文出版比起來，台文出版的編輯技術要求，是加真懸，這馬台文冊當咧起步，猶有真濟台語文字系統需要建立標準，按呢台文出版才會久長。

這幾年台文出版當興，不管是詩集、抑是báng-gà，閣有共世界經典文學作品，翻譯做台語版的小王子、都柏林人等等，各種作品攏有。長期注心台語文創作的王昭華認為，這是台語文過去經過斷層，這馬咧復振的跤跡，證明台語通講萬事萬項。

作詞人王昭華講到，「人香港是按怎會有法度講廣東話，in嘛是現代社會，是按怎臺灣這个現代文化這个部份，咱就缺失，蓋成攏是停留佇鄉土話題，這毋是天然、毋是自然，這是政策一步一步按呢，這是一个語言復振，這片塗你本來是種這个，啊你規个予人彼个破壞掉，你閣欲共伊種轉來。」

用平板電腦，就通讀中央通訊社出版的電子冊，「島嶼文化事：臺灣藝文百景」內底有關注這幾年台文的出版業，佇咧拜四也舉辦座談會。長期出版台文冊的前衛出版社講，雖然這幾年台文冊市草好，但是台語文出版的人才、資源，猶是有真濟挑戰。

前衛出版社主編鄭清鴻表示，「可能會認捌講編輯啊毋著仝款，華語的編輯按呢做，我台語就按怎做，但是事實上毋是按呢，譬如講華語敢有需要去考慮，啥物漢字佮羅馬字的問題，華語敢有需要去考慮講，我的讀者台語的能力，坎站到佗位的問題。」

鄭清鴻講，和華文出版比起來，台文出版對編輯的能力要求是加真濟，而且目前台語文字欲會當正常顯示出來，技術嘛猶無夠成熟，增加台文出版的難度。鄭清鴻認為，台文出版長期靠中央嘛補助毋是辦法，出版業和政府應該對這馬開始，建立各種台文出版的標準流程佮系統，按呢台文出版才通永續發展，行會久長。

記者 郭柏均 林郁凱 台北報導