新竹縣停課2日 欲供應營養午餐的菜無出貨
發布時間：
更新時間：
北部地區連紲歇兩工的風颱假，本底準備好勢，欲提供予學校煮營養午餐的菜蔬，煞變做無所在通去，其中新竹縣兩工的青菜量欲到4噸半。為著幫助農民，農會特別開放予民眾來交關選買，希望降低風颱天對農民的損失。（新聞標題、導言及內文皆為臺語文）
共青菜一包一包款予好勢，準備送出貨，遮的攏是原底準備提供予學校做營養午餐的有機青菜，拄著連紲兩工的風颱假，予遮的青菜雄雄無所在通去，新竹縣趕緊招逐家做伙來共農民鬥相共。
民眾：「風颱天市場青菜起甲攏誠貴，這有機青菜內底攏總有六包，滿滿的六包，每一包攏500公克，才賣三百箍爾爾，買轉去厝內，差不多就會當食一禮拜。」
新竹縣長 楊文科：「這擺兩工的量差不多4.5公噸，阮已經賣出2.7公噸，只賰1.8公噸，希望逐家做伙來幫忙買有機青菜。」
這擺受著連紲兩工的停班停課影響，新竹縣差不多有倚4.5公噸有機青菜無銷，無所在出貨，上煩惱的是驚青菜無趕緊賣出去，免偌久時間攏會爛了了。
新竹縣農會總幹事 李筱華：「葉仔菜類若是3工無處理，葉仔菜類就會變黃去，就會造成食材的浪費，而且這馬是風颱天，青菜是真珍貴。」
新竹縣農會指出，目前逐禮拜，提供予學校營養午餐使用的青菜量倚10公噸，這擺經過逐家鬥相共，賰的1.8公噸青菜也已經銷出去矣，嘛予農民的辛苦袂拍損去。
記者 張君豪 新竹報導
唐嘉良/編輯
