地動風颱衝擊花蓮 9-11逐月補助1千救觀光

訂房間的網站頂懸滿滿的選擇，毋過每一間價數攏佇2000箍以上。若是較高級的飯店，平均攏愛10000箍以上。根據觀光署113年的頂半年的統計，台灣的平均房價是2885箍，比舊年2956箍，閣較減71箍。雖然有較減，毋過真濟民眾攏感覺減無濟，無啥物感覺。

民眾朱小姐講：「佇臺灣𨑨迌不如去國外𨑨迌就好，因為飯店價數差無濟。」

民眾吳小姐講：「兩个人大概2600箍，真濟足袂和，因為內面感覺環境衛生摒掃攏無摒掃足好，就是價數有一寡袂和。」

台灣飯店、旅社貴參參，是國人甘願出國tshit-thô的原因之一。閣加上，花蓮大地動、佮凱米風颱，去花蓮tshit-thô的民眾干焦賰2成，為著欲推動花蓮的觀光，觀光署推出補助計畫，民眾佇9月份至11月份去花蓮tua飯店，政府逐個月會補助1000箍。

花蓮居民柯小姐講：「我是蹛花蓮的，然後我明顯感受著，像阮逐年歇寒歇熱觀光地點人攏足濟，今年就是愈來愈少人，變足少。」

觀光署旅宿組組長曹逸書表示：「受著這个0403的地動閣有風颱，阮9/1到11/30(期間)，逐个月攏會當使用一改(補助)，上濟補助1000箍。」


觀光署表示每一間業者的品質、佮服務本底就無仝。只要價數佇合理的範圍，政府會尊重市場的機制。毋過政府會要求業者愛提升飯店、旅社的品質。觀光署嘛建議業者將旅遊結合地方特色，增加國人的旅遊意願。