嘉義台語文學講座 5位作家用詩文佮逐家交流

臺語詩人路寒袖老師，向逐家來紹介伊的作品，有講國家歷史的詩，嘛有紹介臺灣各縣市的詩。路寒袖老師就鼓勵逐家講，臺語詩會當有誠濟藝術呈現的方式，透過這種結合，就會當共咱的文化佮母語，予閣較濟人來看著。

笨港讀書會老師 黃慧玲：「有的人攏對臺語有一寡誤解，感覺伊就是較粗俗、較粗魯，但是咱佇這个過程當中，聽老師按呢分享，咱會感覺講實在足優美、足優雅的，而且閣充滿著對這塊土地、這種感情、這種愛。」

臺語詩人 路寒袖：「我希望講這歌詩的作品，伊會當涵蓋的面，會當較闊咧，無一定講干焦某一个層次，所以不只是講，詩佮音樂做結合，我嘛盡量共詩去佮戲劇、佮舞蹈，甚至共藝術歌曲、歌劇去結合。」

嘉義市文化局配合在地的獨立冊店，邀請幾若位臺語詩、臺語小說，或者是臺語文推廣的人，針對臺語文學舉辦講座活動，希望來推廣臺語文的閱讀、創作佮學習。

幼穎兒童臺語文學總編輯 韓滿：「寫文章，抑是講欲寫歌，恁若無臺語文的底蒂，抑是講恁無講臺語，恁無法度寫出遮媠的詩。」
洪雅書房負責人 余國信：「上重要就是欲揣轉來，恁愛去看冊，讀冊的力量，閣來恁愛家己動手，共恁爸母話記錄、寫出來按呢。」

路寒袖老師表示，母語的保存，袂當干焦靠國家的政策來要求，透過詩、小說，或者是歌詞遮的文學作品，予語言佮文字的使用倚近生活，才會當予臺語文的推廣愈來愈順利。

記者 林緯廷 嘉義報導