傳承內陸型王醮文化 宮廟辦鯉魚公工藝課程

學生起頭用黏塗先捏魚仔的形體，挲圓形做魚仔的目睭，才閣用刀仔割出魚尾的外型，落尾佇魚鰭頂頭插五方旗，這隻古錐的鯉魚公就做好勢矣。雖罔這鯉魚公是古錐版，伊是柳營代天院，代天巡狩出巡時，𤆬領王船方向的領航員，也守護安全。這擺廟方參校園合作，用趣味的方式， 𤆬囡仔做黏塗那認捌在地的信仰民俗。

臺南市柳營國中學生，「鯉魚我有捏伊的目睭兼喙。」

臺南市柳營國中學生，「佇遮生活遮久攏無正式去了解遮，今仔日就了解足濟代天院的由來，佮鯉魚公的。」

柳營代天院文傳副組長黃宥辰，「鯉魚公的金身攏有這个，五方旗的特色，這改的課程透過捏塗的活動，予學生會當了解著鯉魚公，金身的特色。」

柳營代天院主神遊王公，因為神階懸，早前較少咧分靈，相傳鯉魚公通直接傳訊息予遊王公，所以有濟濟信徒會請轉去拜。柳營代天院每三年會辦一科王醮，而且是真罕看會著無靠海的內陸王醮。今年廟方設計課程毋但教囡仔動手做鯉魚公，嘛認捌百冬歷史的王醮特色。

柳營代天院主會鄭百成，「請王 咱會當看著任何所在，大多數的請王攏是，佇海邊仔抑是溪邊，柳營自古阮遮就無，伊是對南爿嘛就是山爿，並無去到溪邊。」

臺南市柳營國中校長陳育生，「以往予學生佮家長干焦知影，柳營代天院有遊王公祖，希望透過這改實際上，來了解規个柳營王醮的歷史。」

柳營代天院的王醮文化，佇2022年嘛成做市定民俗。廟方這陣透過手工體驗課程，來推捒這項無形文化資產。