新莊「RE³布袋戲特展」 對傳統戲劇看在地文史

布袋戲尪仔頭，配上燈光閃爍，敢若親像尪仔互相咧對話。這是當咧新莊文藝中心的布袋戲文物館展出的"Re三次方布袋戲特展"，這三次方分別代表再創作、再想像，以及再製造。展覽由"真快樂掌中劇團"策劃， 佮三个藝術家合作，用油畫、影像裝置，紙枋以及3D列印等多媒體的方式展示。劇團認為，布袋戲雖然是傳統藝術，但去思考創新或者是現代化，並無衝突。

真快樂掌中劇團行政總監柯世宏講:「你講傳統佮現代這个物件，伊是同齊進行的，毋是講咱這馬已經現代，傳統就無去，嘛毋是講咱這馬攏保留傳統，咱就無法度閣較現代，(這改展覽)其實咱是想講，咱這傳統的物件，閣有啥物可能性會當發生。」

新莊文藝中心講，因為新莊有一條戲館巷，過去布袋戲的文化真興旺，展覽中會當透過在地畫家簡文仁的畫，看著過去新莊人生活中的布袋戲文化，伊講新莊布袋戲文物館到今年是第20冬，這改的展覽是希望透過布袋戲予民眾知影地方文史。

新莊文化藝術中心主任莊雅雯講:「這改的展覽較特別的一點是，除了布袋戲本身的內容以外，阮嘛邀請新莊在地的油畫家，為咱畫出早期(在地)布袋戲的景象，融合佇阮新莊老街的風貌。」

布袋戲佇臺灣的發展超過百冬，對外台、內台到電視、網路，經過幾若改創新的過程，劇團講，這改展覽上主要就是想欲予逐家看著布袋戲佇這个時代的可能性，望這个表演藝術會當閣一改融入民眾的生活中。