「中華一番」推出台語版 6/3開始YT連播12集

用活潑的台詞、佮豐富的表情和情緒，ﰓ觀眾做伙來感受料理的口感佮特色，"中華一番"是濟濟臺灣民眾攏捌看過的日本動畫，見擺佇網路放送的時嘛攏會引起濟濟討論，臺灣的動畫代理商最近也趁燒推出台語版。

木棉花國際商務專案經理陳奕彣表示：「這个節目以早足濟人攏有看過，所以足有名，一方面是因為內面有足濟對話，猶閣有足濟故事，是足出名 足好耍 足趣味的，所以咱就選擇中華一番。」

代理商表示怹自"間諜扮公伙仔"台語版推出以來，收著濟濟熱情的回應，予怹想欲繼續試無仝類型的動畫來做台語配音。這改"中華一番"以經典的「黃埔江樓麟艦宴席料理大賽」來配台語版，像解師傅的黃金開喙笑、歹食印等等攏會出現佇劇情內。

台語版的中華一番配音員，嘛攏揣有10外年以上的老經驗，怹希望用生活化的台語，tshua7逐家同齊看這齣經典的美食動畫。

「小當家」角色配音員李明幸表示：「語言物件一定足深的，阮攏是那行那學，毋過你至少愛有基礎，你若無基礎欲按怎改，你無法度改嘛 OK，所以你一定愛去上課。」

「雷恩」角色配音員 林谷珍表示：「台語(配音)是最近這幾年較開始，較有啦較濟啦愈來愈濟，這嘛是一件好代誌，就予逐家較了解咱家己，本土的話是按怎講。」

台語版的"中華一番"自6/3開始一工播一集，攏總欲播12集。代理商指出目前網路的反應袂bai2，若是關注的人愈來愈濟怹嘛會考慮共52集全部配做台語，嘛希望引起逐家對台語的興趣。