臺南大學佇人行道畫停車格 交通局欲去會勘

規排車停甲滿滿滿，oo-tóo-bái攏總停踮人行道，原來是有劃停車格的，毋過民眾咧通行愛倚較邊、嘛有奶母車真僫捒的狀況。佇市區的臺南大學，學生濟加上周邊袂少店家，車位常在無夠停，學校近來開放會當停踮新設的格仔位，這个作法引起討論。

台南大學在校生講:「感覺足譀古，無考慮著過路人，而且遮真正人流量真大。」、「若是人行道攏欲設停車格，其實對逐家來講，我感覺佇安全頂懸嘛是愛需要去思考。」臺南市人本交通促進協會理事王育翔講:「oo-tóo-bái欲落去的時陣，伊袂用牽的，伊會用騎的，人若行佇咧頂懸就會心驚驚，會當設置一个實體的避車彎，這个避車彎就比論講遮挖一个空，專工會當予oo-tóo-bái停佇遐，按呢oo-tóo-bái欲停嘛較方便。」

協會認為學校，無應該妨礙過路人通行，其實遮原本規逝路攏設花台。校方講，當初因為停車需求大，校門口的車路狹，才共花台拆掉，路面嘛向內縮小50公分，保留150公分的人行通道，尾手in才家己設百捅个停車格。雖然校方掰會這是校地，毋過交通局回應，標線猶是袂使家己烏白設，講後續會去現場做會勘。

臺南市交通局簡任技正黃俊傑講:「道路交通管理處法條例，人行道原則上是禁止機車停放，例外是必須愛由交通局，來做適度的規畫佮設置相關標線，來規範機車停的所在。」臺南大學主任秘書許誌庭講:「會閣邀請咱市府佮民意代表，甚至講有關人本交通的相關團體做伙來會勘。」

校方指出，人行道停車格若有影響著逐家，會趕緊邀集相關單位鬥陣做參詳，嘛強調會閣做改善，提升逐家騎車佮行路的安全性。