紀念北管國寶莊進才 臺灣音樂館出專冊記錄

北管樂器鬧熱的氣氛，毋但會當提來搬戲，佇民間的迎神、做醮、喪事等等的場合嘛看會著。創立漢陽北管劇團的莊進才老師，2021年7月份過身，食到87歲。伊自十歲開始就綴阿爸佇戲班那聽那學，啥物樂器攏會曉，予人呵咾伊是「八隻交椅坐透透」的國寶級大師。記錄莊進才老師一生的新冊，佇拜四舉行發表會，濟濟莊老師的學生攏有到位，嘛包括音樂製作人陳明章。

音樂製作人 陳明章：「予人知影講，伊會使佇性命中，伊為啥物欲遐爾仔堅持欲共北管留落來，伊的精神傳予阮這馬，阮這馬嘛仝款教學生嘛是按呢」

臺灣音樂館也表示，in有責任將臺灣的音樂傳承、推廣出去，這改才會出版這本冊，將莊老師的一生記錄落來。作者劉秀庭表示，出版這本冊的目的也希望政府會當佇教育方面加鬥出力。

《漢陽吹虎：北管守護人莊進才的曲藝人生》作者 劉秀庭：「較早期會當建立相關的，彼種的智識，就算你一世人干焦會曉唱兩句的流水，這佇咧教育方面會當做的就是共譜做予好，予囡仔會當至少有一點仔印象，伊以後就有一个起點，若無咱的物件會落足緊的」

劉秀庭表示，向望政府投入閣較濟的資源，予囡仔自細漢開始接觸，遮的傳統文化才有機會繼續傳承落去，伊嘛認為，毋管佇啥物款的領域，建立資料攏是一件真重要的事情，假使講有心，任何人攏會當做一个記錄者，做伙將遮的，珍貴煞強欲無去的傳統文化傳承落去。