2023十大藝文新聞 「看表演免掛喙罨」上濟票
發布時間：
更新時間：
臺北藝術大學對2010年，逐年攏會舉辦投票活動，選出民眾佇彼年當中，上要意的10條藝文新聞；今年計共2243个民眾參與投票，三分之二是藝文工作者、三分之一是一般民眾。排名結果，前五名內底，佮疫情過後相關的新聞就佔三條；主辦單位希望透過這款活動，予政府知影藝文工作者佮民眾的需要，成做推動政策的參考。（此則新聞標題、導言、內文皆為臺語文。）
文化部次長李靜慧，公佈2023年藝文新聞當中，上予人關注的，就是民眾看各款表演，總算免閣掛喙罨矣。
文化部次長李靜慧表示，「2003年SARS過了後，咱攏感覺這代誌應該結束矣，啥人攏想袂到2019年的時，會來一个COVID-19，文化部佮所有表演團體，按怎準備好，後一擺咱欲按怎應對。」
臺北藝術大學對2010年開始的投票活動，每年選出十條民眾上要意的藝文新聞。今年的前五名，除了排頭名的看演出免掛喙罨；第二是2022年藝文票房，已經倚近疫情進前的水準；第三是台灣頭一个定目劇場啟用；第四閣是疫情相關的、文化幣政策擴大實施；第五是台灣雕刻家黃土水的作品甘露水、予文化部指定做國寶。北藝大講，透過投票，希望會當影響中央的文化政策。
國立臺北藝術大學副校長劉蕙苓說明，「咱的社會一直呼籲一寡代誌的時，這會成做一種力量，這種力量佇適合的時間點，就會成做政府政策的一部份，我家己真有感覺的是，選戰到現此時為止，若像咱猶看無，這三組主要的總統候選人，到底提了啥款重要的文化政策。」
劉蕙玲舉例，過去劇團倉庫大火，捌排佇年度十大藝文新聞內底，致使中央開始重視藝文團隊倉庫安全問題；也有藝文工作者過勞的新聞上榜，落尾中央的文化基本法，就有保障藝文工作者的基本權利。主辦單位望透過這擺的排名公佈，呼籲3个總統候選人，提出相關的藝文政策。
洪家馨/編輯
