臺南柳營王醮三年一科 10門炮王船造型重現

廟埕頭前鬧熱滾滾，濟濟人咧鬥搝這隻「遊王號」，in完全靠人工來替王船開水路，欲共搝到50公尺外的王船地，完成開光點眼儀式。臺南柳營代天院每三冬辦一改王醮祭典，是地方重大盛事，佇舊年嘛予人列做市定民俗。根據了解，遮是唯一無靠海、真罕看會著的內陸王醮，唌袂少家長揣囡仔來認捌在地文化。

民眾講，「著啊，揣囡仔來看看王船的媠。」

民眾，「下禮拜欲燒啊所以出廠，今年做的較特別，在地人足期待的做王船醮，三冬才一改啊、別位看無」

這隻遊王號，船身15公尺、闊6公尺，廟方開上百萬打造。詳細看王船頂頭參一般的型無相共。廟方指出，為著欲保留原本樣，in這改復刻69冬前的王船造型，除了王船內底干焦有王府爾，船身兩爿恢復成有十門砲。另外，廟方提當時in予國外雜誌刊出來的封面，予逐家通做比對，遮嘛是傳承文化上好的證明。

柳營代天院管理委員會常務委員鄭百成說明，「過去頂懸並無媽祖樓，所以阮才共媽祖樓取消，兩爿會使看著十門砲，就是屬於戰船的造型，目前戰船的造型已經改無去，攏以八仙吉祥圖樣來取代遮的炮管。」

29重頭戲欲辦燒王船科儀，廟方指出，送王主要有眾神賜福，掃除瘟疫的意義，in嘛藉此希望共珍貴的文化資產，世代相傳 。