臺北靈安社注心傳承北管 保存無形文化資產

當咧台頂表演北管的，是已經有153年歷史的北管軒社--台北靈安社，台北靈安社2011年予人登錄做神將陣頭保存者，今年閣以北管、得著無形文化資產保存者的肯定，台北市文化局也為in舉辦授證典禮。

台北市文化局長蔡詩萍講：「150年來真正無簡單，伊迒過無仝政權、迒過無仝族群，到現此時咱徛咧遮，佇一个古蹟內底，就真正感覺『藝以人揚』。」

台北靈安社對1871年成立到今，傳承也捌斷過一段時間，落尾𪜶積極復興，已經恢復迎城隍踩街、北管表演這寡傳統，也積極招少年人參與。

台北靈安社總幹事吳柏勳分享：「咱有這个責任、有這个義務，愛來推廣北管傳統文化，咱有對小學生、嘛有中學生參與。」
台北靈安社國小成員，也參記者分享𪜶對北管的想法：「因為有興趣，有興趣啊，阮兜家己就有咧拜神。」

台北靈安社表示，𪜶自2010年開始恢復練習北管，一開始只有5、6个人參與，推廣到今，已經有40幾個來自無仝領域、年齡層的人參與；𪜶也歡迎各界對北管軒社有興趣的民眾，做陣加入傳承。