聲樂家曾道雄11月西班牙演出 結合傳統布袋戲

現場攑傀儡尪仔咧和民眾互動的，就是捌提過國家文藝獎的曾道雄老師，伊手裡攑的尪仔誠特別，是西洋人的造型，就是因為這改伊欲ﰓ領臺灣的聲樂家、布袋戲藝師和樂師，去到西班牙演歌劇，除了共西班牙作曲家法雅的作品結合傀儡尪仔演出，嘛改編布袋戲國寶陳錫煌老師的作品「巧遇姻緣」以臺語和客語用咱傳統布袋戲來表演。

臺北歌劇劇場藝術總監曾道雄講，「東方西方的交流，予咱布袋戲佮西方傀儡戲結合，所以這就是那本土那國際，這馬那本土那國際這是口頭話，這馬實在阮來落實。」

法雅是西班牙上有代表性的作曲家之一，伊的作品有強烈的民族特色，曾道雄少年時去到西班牙留學，嘛真尊敬這位作曲家，會當共臺灣的文化藝術紮去到西班牙交流，是伊一生的夢想。所以除了演出，嘛會向西班牙人紹介臺灣布袋戲各種角色的特色。

布袋戲藝師黃僑偉馬強調，「老師會佇比如講丑仔內底，老師會加一寡較趣味的物件，比如講伊會講，東海出龍蝦，南山出好茶，猶若查某我看(按怎樣啊)，嘿嘿嘿嘿，媠的攏我的」

這改曾道雄ﰓ團去到西班牙演出，是一場東西方的交流，嘛是一種藝術外交。佇咧演出結束了後，也欲共魁儡尪仔送予西班牙法雅博物館收藏，未來佇博物館內底，嘛會設立臺灣展覽專區，以後世界各地的外國人，攏通佇遮看著咱臺灣的藝術文化。