臺南孔廟迷眾頁出現臺語詞 議員批評看攏無

天猶未光真濟人來全台首學台南孔廟參加祭孔儀式，毋過進前孔廟佇官方面冊分享準備活動的過程，貼文使用部分台語詞兼用羅馬拼音來標示讀音，其中文章內寫著「操切」予人掠無摠，國民黨台南市議員王家貞27咧質詢時，批評政府按呢舞，會予民眾看無貼文的意思。

「無用漢字的臺語文，嘛無用羅馬拼音，所以阮一般人讀就是講操切」

孔廟文化基金會執行長回應，伊當初會寫台文，主要是紀錄參民眾互動趣味的過程，毋過煞引起引起地方討論，民眾嘛有無仝看法。

民眾：「這嘛是臺灣本土文化之一，所以我是感覺無應該用排斥的心態，去看這件代誌。」

民眾：「只要有參國語並行，應該是我會使接受。」

台南孔廟文化基金會執行長石牧民說明：「華文辭典內底有解說，伊是講做代誌真急，我咧寫的時陣、我想欲呈現，咱孔廟咧準備祭孔的時陣，逐家人足無閒的、真積極咧做這个代誌。」

臺南市台語文化班學會理事長黃良成指出，國家語言法既然通過矣語言就愛平等，伊認為無應該看無就反對。嘛有議員表示，希望臺灣會使落實多元島嶼的精神。

臺南市台語文化班學會理事長黃良成：「第一我感覺，你敢有共人尊重這个自主權無，言論自由自早就已經是普世的價值，敢會使因為你個人的看法無仝，就共人否認抑是共人抵抗。」

台南市基進黨議員李宗霖：「早期的新港文書內底，嘛攏是用羅馬拼音，咧記錄咱原住民遮的故事，希望講臺灣會當有這个空間，共保留落來。」

針對面冊貼文，文化局講，IN會檢討做改善，日後嘛會共面冊文章調整成較濟人閱讀的語言來寫。