用臺語教「peh壁」 家長招團予囡仔運動學母語
楊舒晴／彰化報導
發布時間：
更新時間：
目次
最近這幾冬，臺灣開始流行peh壁、爬岩仔這項運動，但是你敢捌聽過用臺語來教按怎peh？這陣佇彰化就有家長招團，開全臺語的課程，希望臺語佇每一個所在愈講愈自然，成做生活中的語言。（此則新聞標題、導言、內文皆為臺語文。）
囡仔聽老師的指令動起來，軁磅空，跳格子，閣有基本的溜索仔，這是peh壁的基本體能訓練，無仝的是，這節課老師用臺語落教，頭擺試用臺語教課的羅英銘教練，嘛希望用上自然上正範的臺語予囡仔聽有。
peh壁教練羅英銘講：「我臺灣人，我臺語講甲誠輾轉，問題你雄雄欲教課，你會轉袂過來，你講欲講peh壁嘛好，欲講控壁嘛好，伊的名詞是以每一个人，地方伊感覺上有味的彼个物件，伊共翻做伊彼个名詞。」
囡仔認真運動，耍甲誠歡喜，有家長表示，參囡仔講母語的過程，嘛是共家己的臺語學轉來。
家長表示：「我家己嘛愛共臺語學轉來，因為我的臺語無遐好，拄開始的時陣，所以就是那查那聽那問。」
招團人雀可表示：「發動這種報名的時間，足濟家長攏足有興趣的，有的人對臺北來，有的人對臺中來，閣有對國外拄好轉來臺灣，嘛會專工tshuā囡仔來參加，就表示講，其實臺語活動是希望愈來精采，愈來愈濟種。」
現此時臺灣的母語家庭愈來愈濟，家長嘛期待未來有閣較濟臺語相關的活動，予囡仔有閣較自然的語言環境，予臺語成做生活中真正有咧使用的語言。
張曼亭/編輯
