UBike用戶個資漏洩 臺南議員質疑市府應對傷慢

YouBike公司的系統受著境外攻擊，全台灣可能有四萬偌人的個資洩漏。YouBike下晡提出補償方案，受害的會員每一个人、有五百箍的騎車券，按算會佇九月底進前發放。

有跤踏車欲去佗位攏真利便，YouBike佇不少縣市使用率攏真高，毋過，煞傳出in予境外駭客攻擊系統兩擺，偷會員的手機仔號碼佮掌握騎幾改跤踏車紀錄，藉這个機會拐騙鄉親。根據了解，全台灣估計有四萬偌人受害，其中臺南就佔109筆。臺南有議員質疑，市府對資安的反應傷慢，愛跨部門聯合防備，莫影響消費者權益。

民眾 吳先生表示：「這馬個資法親像真濟物件敢若無足完善，阮嘛會驚這馬詐騙遮爾濟。」

民進黨臺南市議員 蔡筱薇表示：「袂當講敢若孤一个局處來面對按呢的問題，按呢的力量佮了解，這个體制組織的部分是無夠的。」

YouBike予民眾印象原本真好，毋過發生按呢的代誌，逐家心驚驚。交通局講，22已經佮其他縣市代表，去總部做資安稽查。另外，嘛要求微笑單車公司，提出改善策略佮補償方案。

臺南市交通局綜合規劃科長 莊惠忠表示：「（微笑公司)相關的資安，已經進行相關的加強，然後佇當工的下晡，就重新拍開會員的網站，微笑公司ﰀ會統一佇26號下班進前，提出對全臺會員的補償計畫。」

交通局講，目前公司已經配合相關單位全力調查，持續加強資安。紲落來市府會做詐騙宣導，提醒民眾愛定期換暗號。