傳承古早"相褒歌" 專家林金城注心記錄閣兼推廣

聽起來親像客家山歌，這號做相褒歌，序大上課毋但綴咧唱，也回憶往日的情境。

文史工作者林金城表示：「彼个60、70年前的物件，到這馬伊閣原封不動唸予你聽。」

文史工作者林金城講，相褒歌也叫做挽茶歌，通常是男女那作穡那唱來做議量，以一句七字的四句聯表現，格式佮歌仔戲、歌仔冊仝款。有80外歲的阿媽，綴喙就通唱出少年時佇礦場食頭路唱的相褒歌。

學員表示：「歹命阿哥就趁食，歹命阿娘就捒車，阮就愛捒車，推礦車矣。」

文史工作者林金城表示：「頭前兩句會寫景，後壁彼兩句是寫情，用四句講你的心情，抑是講你的看法。」

林金城講，因為歌謠攏是口傳，伊自早年開始就以新北為主寫過幾若本的地區相褒歌，前年佮舊年也閣完成兩本，而且用文字影像等等共記錄落來，希望通傳承這个風俗文化

學員表示：「這是老一輩的文化，佇阮這年紀的，會希望有閣較濟少年人，加入文化的傳承。」

文史工作者林金城示：「咱這个文化資產，愛予伊重新閣再，看通予伊活起來。」

林金城表示，伊發見若閣無趕緊做，老一輩凋零會加速文化流失，這馬就是那推廣那做，望少年輩也通知影。