咱共澳洲訂著第4批雞卵 第2批36萬粒下晡到

前幾工澳洲進口卵來救援，但是有人質疑卵價傷懸、為啥毋是對東南亞國家進口。

農委會主委陳吉仲表示：「越南抑是中國，IN攏是有注疫苗，注疫苗的卵阮完全無考慮。」

進前講目標是向澳洲進口500萬粒的卵，農委會初三下晡表示，紲落來已經訂著4批，逐批大約攏是36萬粒。除了暫時用進口紓解欠卵，也決定三冬開10.5億補助禽舍改建。有學者講，若將傳統的改做水簾式負壓環境控制禽舍，通改善產卵率。

逢甲大學國際經營與貿易系教授楊明憲表示：「其實傳統的雞舍，若提升做水簾式雞舍，伊的產卵率通閣提懸一成，第二个共咱傳統的塑膠籃仔，改做用卵盤的方式，運送當中的耗損，抑是破損會(減)一成。」

農委會表示，目前國內卵雞場規模佇5萬隻以下的占欲9成，是主要補助對象。雞農的代表除了支持禽舍改變，認為嘛愛連紲進口，才通穩定需求。

中華民國雞蛋運銷合作社理事主席吳天福表示：「卵供應較慢爾，而且政府這馬，真積極補咱台灣的缺口，對國外進口。」

農委會講，禽舍對開放式到非開放，上懸補助450萬元，水簾負壓上濟補助一千萬。毋過畜牧處也表示，改建禽舍一般需要半冬至一冬，毋是逐个雞農攏有意願，會那做那調整。