2/21世界母語日 新竹美學館設計遊戲學臺語

導覽老師用台語，共囡仔紹介新竹美學館過去的歷史。閣有台語諺語體驗，予囡仔知影內底寫的內容到底是甚麼意思，以及鉛筆盒仔台語教學，囡仔學煞攏感覺真趣味。

小朋友講:「足趣味的，因為按呢我的台語會變閣較好。」臺語導覽老師呂素蓮講:「譬如講建築物，抑是這个所在按怎去解釋，咱這擺的特色就是閣有交通以及紹介食的物件，所以用足生活化的臺語，來教囡仔。」

配合世界母語日，主辦單位辦活動，予囡仔那耍那學台語。對遊戲內底輕鬆來講台語，尤其是學會曉平常時、生活當中會當接觸到的物件、欲按怎講。
 

新竹市生活美學館館長葉于正講:「阮有六个關主，攏用臺語來責督，希望囡仔透過過關的方式，用臺語來當作生活語言的一部分。」

透過活動除了予更加濟人，會當較捷講台語，嘛用上自然的方式，希望予逐家佇平常時的生活，就會當盡量講出家己的母語。