中華大學的國際專修部，專門收國外的學生，毋過這馬傳出有一个越南學生，來台灣才五工就失蹤，敲電話嘛無人接。經過追查，才發現這个學生，過去捌用移工的身份來台灣。學校表示，未來會嚴格審查學生的身份。
老師利用中英文佇教室內底上課，中華大學成立國際專修部，目的是欲招東南亞閣較濟學生來台灣學華語，嘛方便in畢業了後留佇台灣食頭路。毋過最近煞傳出有越南籍學生，入來台灣才五工人就無去，電話嘛關機，新竹市移民署接著通報，已經開始進行調查。
中華大學副校長 解鴻年講：「所有學生攏有厝內人的聯絡方式，聯絡厝內的人嘛揣無人，電話嘛關機」
學校表示，學生一旦欠課超過規定就會退學，而且取消入境資格。連絡移民署才知影，原來這个同學捌來以移工的身份來過台灣。
中華大學副校長 解鴻年表示：「(未來)學生申請入學，阮會先將資料送去移民署過濾，若是捌來台做移工阮就袂錄取，做第一个篩選條件」
中華大學國際專修部目前有11个系所，招生總名額270人，其中95人已經註冊完成，學校講未來嘛會嚴格審查學生的身份。
