國產新車安全評等相挵測試 驗一款就1500萬
郭柏均 張育睿／臺北報導
發布時間：
更新時間：
目次
為著欲提升國產車的安全，交通部的新車安全評等計畫，進前頭一改測試市面賣上好的新車，予消費者通知影這寡車的安全性。毋過測驗的所費煞是真驚人，一種車型的測試就著開1500萬。
白色的車大力共挵落去，車頭變甲糜糜卯卯，這是臺灣新車安全評等計畫TNCAP、試驗車輛安全性的畫面。交通部表示，透過TNCAP計畫測驗新車，會使予民眾更加清楚家己的車輛安全性佇佗一个層級。
交通部路政司科長趙晉緯表示：「車輛欲領牌攏愛符合，各國的車輛安全法規，符合法規的要求，代表伊有基本的安全保障，咱的車輛安全性，敢有比法規要求閣較好，予伊願意付閣較濟錢，去買伊的車，TNCAP用比法規閣較懸的標準，來進行試驗。」
TNCAP估計一年測驗8種車型，以銷量做揀車標準，第一个車型佇10月27進行公開測驗。但是測驗的所費真驚人，一个車型需要買4台車，規套測驗差不多愛開1500萬，TNCAP按怎永續經營也成做大問題。
交通部路政司科長趙晉緯表示：「這馬當咧佮相關車商業者，公會進行討論，針對按怎永續運作TNCAP做討論，阮也希望車商會使主動來自費做評等，抑是提供車輛試驗。」
目前測驗是由TNCAP委託消基會，假扮做一般消費者買車，避免車商提供改裝車測驗，未來若欲是車商提供車輛，按怎保證受測驗的車輛攏是公平無受改裝，也成做考驗。交通部表示，會做把關。
專題｜改造地獄路 台灣行人路為何難行？
