臺大.陽明交大研究 車踏擋產生金屬坱埃致空汙

車行頭家講:「(煞車皮磨耗)會造成金屬粉屑佮擋仔盤的損蕩，影響真大。伊可能會共擋仔盤的金屬剾出來的部分，就會有真多會產生真多金屬的粉塵。」

都會地區定定咧窒車，尤其是上下班時間，駛車不時就愛踏擋，踏愈濟擺，來令佮擋仔盤一直礪，毋若損蕩車輛，嘛會產生危害空氣品質的金屬粉塵，透過喘氣進入人體。

陽明交通大學環衛所所長紀凱獻就講:「汽機車佇前進的過程中，咱踏擋，佇金屬摩擦的過程中，其實會產生金屬粉塵遮的金屬粉塵，會對健康佮空氣品質造成影響。」

除了逐家攏知影的煙筒管廢氣以外，臺灣大學佮陽明交通大學團隊最近研究空氣品質發現，車輛踏擋所產生的金屬粉塵，包括鐵、錳、銅等等，嘛可能會造成健康的危害。

陽明交通大學環衛所所長紀凱獻表示:「其實會造成親像是支氣管炎，猶閣有一寡呼吸道疾病，甚至嘛會發生痚呴，所以毋若是咳嗽爾爾。」

專家提醒，佇都市生活，四常拄著空氣品質的問題，欲保護肺部健康，上重要的，猶是愛掛喙罨出門。