嘉義縣動物收容所升級 改善收容環境.醫療資源

嘉義縣的動物收容所,過去是用鐵厝所起的,所以收容的數量佮空間攏有不足的問題,為著欲替收容的動物提供閣較好的環境,收容所重起,成做有生命教育、專業診療、四序收容佮節能減碳的,多功能動保教育園區。

嘉義縣佇2016年捌發生佇運送過程熱死收容動物的代誌,後來嘉義縣政府爭取著農委會的補助,經過7改流標佮2年施工,這陣總算啟用全新的動物保護教育園區。

國立嘉義大學動物醫院院長 詹昆衛講:「逐家知影這个所在以後,可能會開始去關注閣較濟相關,可能原來毋是會去注意,或者是忽視動物保護的一寡仔議題」

台灣之心愛護動物協會 張詠舜講:「內底的燈光看起來攏有設計過,是使用黃色的電火,若參白色的電火來比,可能會當予動物袂遐爾緊張,我家己看起來,是感覺規畫設計了袂䆀」

過去這間動物收容所,只是糞埽掩埋場附近的一間鐵厝,只有50平方公尺 ,這馬新啟用的動物保護園區,有2300外平方公尺,會當收容210隻的動物。

嘉義縣家畜疾病防治所長 林珮如講:「因為較早阮是用鐵厝,來收容遐的散狗仔,所以彼當陣只有提供收容的服務,阮遮重起了後的多功能教育園區,會當有節能減碳、四序收容、專業醫療,另外閣有教育四大主題」

家畜所嘛安排獸醫醫療團進駐,動物會當受著照顧,嘛有規畫完整的醫療空間。嘉義縣政府嘛表示,未來會成立寵物管理課,負責嘉義縣寵物對出世到死亡各階段的照顧,希望落實動物保護的工課。

相關新聞