逐個月補助200 北市女國中生通領免費衛生棉
發布時間：
更新時間：
女性進入青春期了後，月事就會來，這是一種天生自然的代誌。為著莫予這項自本就會發生的代誌，變做查某學生歹勢講的話題。臺北市政府對今仔日開始，欲發予臺北市的國中查某學生，逐個月會當去便利商店換200箍的月事用品。性別的平等佮尊重，就是對生活開始做起。
佇超商印單仔就通佮店員換價值二百箍的生理用品。初七開始，只要是學籍佇台北市的國中女學生，就有生理用品的補助金。
臺北市信義國中學生汪同學講，「進前買衛生棉，攏希望媽媽通做伙去，（按呢以後就通家己買？）著，這馬會使矣。」
除了減一筆費用，學生講有政策的落實參同學講欲買衛生棉也較袂礙虐。市府表示，總共編６千外萬的預算，有３萬外名女國中生受惠，逐張劵的期限是兩個月，到期閣領新的。上重要是欲予學生認捌性別平等。
臺北市副市長黃珊珊表示，「這改咱按呢的一个活動，就是希望講，這袂閣是一件真歹講出喙的代誌。阮希望囡仔自細漢就知影，這件代誌是男女有差別，阮希望會當平等。」
市府表示，進前有試辦佇幾間學校囥衛生棉，成效袂䆀。未來也會評估補助金的作法是毋是擴大到小學佮高中。另外學生除了到超商印單，也通透過師生平台等方式兌換，希望買生理用品的需求袂閣再是女學生的心理負擔。
