論"公投縛大選" 投票率敢代表議題理解程度?

12月18公投，國民黨江啟臣提出的第19案，公投縛大選，正方提出，會當節省行政成本、提懸投票率，毋過反方用2018年的公投反擊，表示縛大選造成選舉混亂、議題失焦點。毋過長期佇民間推動公共議題討論的翁麗淑，對正反雙方的論點，攏有質疑。

鷺江國小老師，翁麗淑表示：「你既然欲落實這个民主，你有可能這个成本的代誌，愛囥佇上尾仔，嘛是參與的人會較濟，是真正投票的比率嘛會較懸，你比率較懸，問題是遮的人會提字條仔來，按呢是欲按怎？你若是會當講，逐家是因為關心這个議題，然後伊就想欲參與，伊想欲好好仔表達意見，按呢是較好。」

公投制度，是人民表達聲音的一个管道，是油門也會使是擋仔。公投案基本上分四種，法律的複決、立法原則的創制，參重大政策的創制佮複決，民眾若無清楚公投提案內容、實際的法律效果，就會演變成就算公投通過，政府嘛無聽民意。

法律白話文網站主編，王鼎棫表示：「以第十案做例，當時的題目是『你是否認為民法婚姻應該限定一男一女？』題目真正的意思是『敢干焦開放民法予同性戀結婚猶是開放專法？』你會發現當時氣氛是咱欲來投票反對同性戀結婚，這个題目有意無意之間就予扭曲。」

政大選研中心主任，蔡佳泓表示：「所以新的 (2019) 公投法有要求，會使共法律效果寫詳細、寫較簡單，公投的內容也袂當傷過複雜，親像雙重否定。」

除了提案內容，猶有成案到投票的時間傷短，立法院對公投案的態度無夠積極等等問題。

政大選研中心主任，蔡佳泓表示：「因為公投法有規定(無強制)，立法機關佇期間內有提出對案，其實是會當免辦這个公投啦，所以目前來講干焦無這種情形發生，台灣立法院敢若親像無𪜶的代誌，就予公投繼續去行，所以我感覺立法院應該著愛扮演重要的角色。」

法律白話文網站主編，王鼎棫表示：「公投往往會感覺是全民的意志，但是斟酌想，提公投的人恐驚是佇生活中，較有閒做這寡代誌的人，可能這毋是大部份無閒工課的人，會要緊的想法，一旦大眾對公投題目閣無時間檢查，咱真有可能無形之中，慢慢仔咧替菁英份子背書。」

共外國相比，台灣的公民投票，行甲猶無算遠，如何實現直接民主的價值，猶需要大眾謹慎思考，對地方發展到國家政策，手中彼一票，投出的攏是關係著國家的未來。