新竹頭座無人機考場啟用 提供民眾訓練.考照

專心操作飛佇半天頂的無人機，完成考試規定的項目。無人機管理制度上路，未來操作一定愛有證照，新竹縣政府特別規劃新竹地區唯一一搭無人機考場，猶毋過新竹的風透甲誠出名，嘛增加考試的困難度。

無人機耍者講：「其實阮操作起來是普通，雖然新竹風透，毋過地形的關係，嘛予遮有較安全飛行的場域。」另外一位無人機耍者表示：「遮算是新竹在地第一个飛場，所以以後逐家欲考試，就免對南北走，佇新竹在地就會使考證照。」

負責單位表示，佇考場設計的時陣，針對新竹風透，嘛有特別用兩爿無仝方向的規劃，來降低對無人機的影響。
 

無人機教育發展交流協會理事長岳志忠表示：「風透的時陣，搢風對考生是較無遮好考，所以這个場地佇徛位的方向，有做兩爿的設置，就是考生會使選擇較好飛的風向來做測驗，按呢對考生欲提著證照比較有利。」

受委託管理場地的協會表示，無人機考場的設置，除了方便新竹地區的民眾訓練考試，嘛會當增加休閒活動，對推廣觀光有加分的效果。