南寮漁港畫紅巡禁亂停車 漁民不滿作業受影響

漁港完成改造工程後，特殊的外型閣加上好食的料理，假日攏吸引真濟遊客來這𨑨迌，嘛引來黑白停車問題，市政府特別劃紅線來禁止停車，毋過畫紅線的區域，有一部份原本是漁民作業的碼頭，引起漁民不滿。

當地漁民表示：「全台灣的港口碼頭，哪有漁民欲出港，車袂使停船隻邊仔？」

「啥人的碼頭親像新竹市碼頭按呢？啥貨攏嘛罰，啥貨攏愛錢。這是漁民作業區，毋是行人步輦區。」

市府對外表示，漁民作業的時陣，會使憑證件暫時停車，畫紅線主要的目的是為著解決遊客亂停車的問題。

新竹市產發處副處長，林柏志表示：「漁民有臨時需要落貨，抑是整理船隻的需求，攏會使停靠港區作業，並無受任何影響。嘛請漁民朋友，共停車證囥佇車內明顯的所在，予執法人員辨識。」

新竹市政府呼籲逐家，因為疫情關係，做生意的店頭誠無簡單才等到遊客，來南寮𨑨迌嘛愛遵守停車相關規定，才袂去影響著漁民的權利。