第一對臺灣.澳門跨國同婚勝訴 今日總算登記

向逐家展出新的身分證，頂懸加了翁婿的名，伊是信奇，佇2019年10月，佮來自澳門的阿古想欲登記結婚，毋過煞予戶政拒絕，經過一年外的官司，兩人總算勝訴，會使登記結婚。

台灣伴侶權益推動聯盟共同創辦人許秀雯表示：「拒絕的原因是講，內政部有一个函釋，彼个函釋的內容是講，若是台灣人欲佮外國人結婚、佮非台灣人結婚，對方必須嘛是來自允准同婚的國家抑是地區。咱台灣法講愛按照各當事人本國法，伊(阿古)的本國法原本是澳門法，但是澳門法講結婚這件代誌愛看伊的長居地法(台灣)，伊(阿古)的長居地拄好是台灣。」

互相替對方掛手指，嘛收下逐家的祝福佮鮮花球，阿古佮信奇一路行來是真無簡單，這擺in勝訴毋是代表台灣已經允准所有跨國同性婚姻，佇台灣猶有真濟無仝國家、狀況相siâng的跨國伴侶無法度結婚，想著遮，阿古就嚨喉淀。

跨國同性伴侶阿古講：「(同婚專法)三讀通過了後全場佇歡呼，我佮in徛做伙哭，看別人會使結婚，家己煞袂使的感覺一點仔攏無好。」

台灣伴侶權益推動聯盟共同創辦人許秀雯表示：「其實外國法若是拒絕同婚，按照台灣大法官的解釋，同婚已經是基本人權矣。若按呢適用這个外國法，就是違背台灣的法律。」

伴侶盟認為，台灣的跨國同性伴侶若欲結婚，需要看對方國家法律，這違反台灣的法律。針對這點的改善，in認為內政部佮司法院有互相捒責任的狀況，所以向監察院遞交陳情，目前當咧調查。