懷胎優先注射 家長:有三個月內幼嬰的也該注

頂禮拜開始，中央開放有身的婦人人，會當代先去注武漢肺炎的預防射。也有民眾佇咧躊躇副作用的問題。毋過婦產科的醫生表示，有身的人，抵抗力較無好，有通注就趕緊去注。另外，有囡仔拄出世，猶未滿3個月的爸母，也希望會當先注，保護幼嬰仔。

中央疫情指揮中心6月21宣布，有身的婦人人列入新冠肺炎預防射，第六類的優先名單，22開始各縣市陸續注射，但有民眾六月中拄生囝，政府才來宣布，失去優先名單的資格。

新手媽媽賴小姐講，「本來有優先權，生完雄雄變上尾一類，爸爸媽媽嘛是愛出門，新生兒佇一個月內其實風險足大的，我是感覺生了嘛是愛有彼資格啦。」

雖然有家長希望，厝內有三個月內的幼嬰會當列入優先注射名單，但也有民眾因為厝內序大煩惱，想欲注也毋敢去。

有身人吳小姐講，「其實我想欲注呢，毋過我厝內底的序大驚講注會有副作用，猶是看新聞有一寡新聞會講副作用真嚴重，可能會死亡，報導傷恐怖啦，看的人會驚。」

婦產科醫師表示，其實國外有案例證實，有身人若穢著新冠肺炎，病毒會傳染予胎兒。婦產科醫生蔡鋒博表示，「以色列發生兩件，一个25周、一个35周，囡仔原本好勢好勢，但媽媽著新冠肺炎結果囡仔死去，以色列共衣提去檢查，規个胎盤攏是冠狀病毒，所以你注疫苗15工母奶就有抗體，如果有身的話，注完臍帶血就會有抗體。」

蔡鋒博嘛講有身人的抵抗力本底就較䆀，若著著新冠肺炎，插管參用呼吸器的比例比一般人加2.9倍，蹛加護病房的機率加3倍，死亡率增加1.7倍，若經過醫師評估無問題，建議有身人猶是冗早去注射。