此網頁已閒置超過5分鐘，請點透明黑底或右上×按鈕繼續閱讀
疫情雄雄衝懸，國內今仔日增加33330个本土病例，死亡個案有17例，另外帶病入境的有541例，這帶病入境出現疫情3年以來，1日病例數上濟的紀錄。有感染科的專家警告，變種病毒BQ.1可能會變國內後一批流行的病毒株，呼籲民眾愛趕緊去注新配方疫苗。臺北的注射站，早起已經出現人陣矣。(此新聞標題、導言皆為臺文)
日本政府無認同台灣的高端疫苗，若是注高端的民眾，這馬欲去日本，可能愛開三千五做PCR，陰性才會當入境。疫情指揮中心今仔日(10/19)就公布高端補注方案，對今仔日開始，民眾提電子機票等證明，就會當隨去注高端以外的疫苗。毋過全部注高端的人，等於愛閣注其他品牌的3筒，身軀頂就是注6筒疫苗，指揮中心也強調安全無問題。
國內今仔日是增加44457例本土病例，死亡有62例，猶原是佇咧疫情的高原期。毋過紲落來，拜四就欲放冗邊境啊，有真濟民眾咧關心確診了後，敢有法度對隔離"7+7"的制度，放冗做隔離5工就好。針對這件代誌，有專家表示，目前攏猶未有共識。
食藥署下晡審查莫德納新配方疫苗的緊急使用授權，核准會當用佇18歲以上的大人做追加劑。衛福部後禮拜一下會召開會議，進一步決定注疫苗的族群，佮閬偌久的時間。有可能全部民眾攏會使注，但是會限制年齡，上緊九月底就開始注。
國內今仔日增加22902個本土病例、中重症40例、死亡個案16例，這死亡人數是97工以來上低的數字。另外英國走代先，已經批准使用新配方的莫德納疫苗。咱的指揮中心表示，目前食藥署當咧審查，若準順利，上緊九月中就會當送到臺灣。
指揮中心宣佈對8/15開始，所有來臺灣的旅客，上飛行機進前免閣提供2工內PCR陰性報告。毋過入境猶是愛做喙瀾採檢、入境檢疫3+4等措施。毋過檢驗陽性的民眾，猶是袂使上飛行機。另外，BA.5可能會夯起來，指揮中心呼籲民眾趕緊去注疫苗。
講臺灣疫情漸漸穩定，當時才會當開放民眾規團出去旅遊咧?觀光局已經準備兩个方案，予指揮中心參考，有可能出入境會仝時間開放；抑若入境0+7的制度，指揮中心只是講，這是未來的方向，但是猶是愛看國際疫情，佮國內防疫的評估。
國內今仔日增加80195个本土病例，中重症344个，死亡增加到159个，是目前上懸的數字。指揮官陳時中表示，整體疫情佇後禮拜會開始下降，毋過臺中的個案應該會增加。另外，國內有囡仔感染了後，有幾落个出現MIS-C、多系統發炎症候群，指揮中心提醒家長，若準少年囡仔佇確診了後的6禮拜內，閣出現發燒、腹肚疼、會吐、會落的情形，就愛趕緊去揣醫生。
為著欲予一寡仔身心障礙的特殊教育學生，莫因為揬鼻仔快篩受傷，這陣有在地的善心團體捐喙瀾快篩試劑，予嘉義特殊教育學校佮嘉義市政府，希望會當照顧著身心障礙者。
