疫情中關懷青少年心理健康 目前只准通訊輔導

疫情影響心理健康，其中，青少年是高風險族群。這馬因為停課，教育部允准學校佇疫情期間，用線頂的方式，提供關懷輔導。其實美國早佇十幾冬前，就咧做通訊諮商，也兼顧對個案的追蹤和管理，民間團體也向望臺灣會當開放，隨時看顧學生的心理健康。

心理諮商師佇線頂聽民眾講心事，這是民間團體佇疫情時期，特別捒的免費諮商服務，才服務三禮拜，就超過1300人，不過青少年族群這馬因為停課，大約3萬位大學生的諮商需求斷去，這陣教育部干焦允准學校，佇疫情期間用遠距離輔導、關懷，袂當做諮商服務。

新北市諮商心理師公會理事長 方將任：「原因考量頭一个當然是資安問題，第二个部份當然是適法性的問題，也就是講佇心理師法的前提下，伊的通訊諮商猶原只規範，諮商所或者是治療所，才會當申請去辦理 去執行。」

社團法人中華民國諮商心理師公會全國聯合會理事長 黃雅羚：「電話的關懷和這个諮商伊是無仝款的，諮商伊是一个固定的時間，咱逐禮拜見面，一擺見五十分鐘，閣來伊會談的主題是較深的，探索伊卡牢的情緒部份。」

專家表示，美國佇舊年3月就發布緊急命令，要求排除所有障礙，予病人順利接受醫療服務，只要確保基本的資信安全，不管人佇佗位攏會當諮商，台灣這馬有申請遠距諮商的學校無夠十間，通訊諮商的年歲也限制愛滿18歲，民團望中央放寬相關法規，予諮商服務閣較即時完整。