疫情害生理 夜市工會:望中央通補助列管擔位 | 公視新聞網 PNN

疫情害生理 夜市工會:望中央通補助列管擔位

這馬因為疫情湠袂煞,全台灣的夜市仔真濟攏暫時關起來。夜市產業總工會、呼籲中央政府,著愛放冗紓困和貸款的申請資格,也愛針對夜市管委會所管理的部分,先匯救助金到擔頭的口座。

一擔一擔的格仔位,攏包包起來,一工收入超過百萬的高雄瑞豐夜市仔,傳出七月底可能會永遠停睏,疫情損斷夜市經濟,排擔的業者表示毋但食材損失了算家己的、店租猶是愛照納,批評政府的紓困4.0申請限制濟、發的速度根本發袂赴養。
 
台灣夜市商圈產業總工會理事長林定國:「電話攏敲袂入去,網路攏登袂起去,你講閣欲速速領著這寡補助款,可能等你電話敲通就已經餓死矣。」
 
高雄凱旋觀光夜市主委劉坤松:「攤商名冊阮有提報予市府佮中央,你是按怎無欲用攤商名冊來做補助。」
 
夜市主委表示已經聯合全台50外个夜市仔,1萬2千擔有連署,希望政府照列管的夜市攤商名冊提供補助,才由管委會等來認定,真正補助著排擔的人。抑若佇貸款身份的認定,業者也希望放寬,予領無紓困的人,會當先向銀行加減借一寡錢。
 
民眾黨立委邱臣遠:「阮會要求經濟部,透過聯福基金會做相關的輔導,上重要的是身份的認定份,我想舊年已經有經驗,是毋是提承諾書或者是同意書,就會當放闊認定。」
 
經濟部中部辦公室表示已經有請各地方政府彙整,全國每一个夜市和市集列管名冊,毋過紓困對象的發放順序和貸款身份敢欲放冗認定,猶是愛照中央紓困4.0比照辦理。

相關新聞

留言區